|
|
作者：劉南芳
四句聯說唱，調用「雜念調」轉「七字」 恆春更去是枋寮，枋寮隔界是佳冬 林仔邊、倚東港，沿海飼魚攏是趁吃人 魚塭相接和相連，海口附近一望無邊 種作蓮霧真普遍，望要好收成、村村迎豐年 無疑八月煞做風颱，狂風暴雨作陣來 海水倒灌真厲害，沖倒海堤變水災 天光無瓦久ㄝ時存、七點無幾分，大水淹入門！ 厝內大小無人敢停困，牽子又抱孫，一家暢暢滾、心頭罩黑雲… 眼看大水一直滿！水淹一樓一樓高、巷路變河川 聽講水沖橋樑斷、大雨落未完！ 村中人人心驚惶，聽到阿兵哥ㄝ喊喝聲、逃生趕緊到兵營 離開阮兜心真痛，想著阮的田園、厝宅亦有果子林 魚塭轉眼變汪洋，辛辛苦苦未當收 可憐心血變烏有，目滓若流若憂愁 大水退利入家門，看到田地總拍荒、心肝足真酸 一家生活怎打算，以後的日子這久長 無水無電想無步，大街小巷攏全土 無位通住真艱苦，一家三代睏同鋪 人講天無絕人路、天破有人補 一支草總有一點露，拜託上帝鬥安湖 甲阮來開路！看到足濟善心人、面生疏 無分東西南北、千里來救助， 教會替阮煮三頓、顧阮ㄝ腹肚、逐工來招呼 驚阮夭、驚阮寒、驚阮受災戶、真孤單 送油更送米、也有瓦斯爐、大口鼎， 泡麵、礦泉水…堆甲若像山！ 人間處處有溫暖，同心協力要來度難關 目滓拭拭卡勇敢，往事一去不回還！ 大厝若倒咱就重起，花謝明年會重開 互相鼓勵、無通放棄，認真打拚總會出頭天！ 來去教會聽道理，教會是咱ㄝ好厝邊 上帝祝福甲安慰，有去有保庇、歡喜共度平安暝 懇求上帝來幫贊，恩典降臨救台灣 賞賜生活真美滿，唸歌做戲謝平安！ （收歌尾）做戲謝平安！
|